Li Şengalê Dewreya Şehîd Zagros bi 45 kesan dest pê kir

28

 

 

TOLHILDAN OZAN/RODA ROJBÎN/ŞENGAL/ROJNEWS

 

 

Li Şengalê li Akademiya Bîrdozî û Leşkerî ya Şehîd Dilgeş, Dewreya Şehîd Zagros bi 45 kesan bi merasîmeke leşkerî ya fermandarên YBŞ û YJŞ’ê jî amade bûn hat destpêkirin.

 

 

Di vekirina dewreyê de ji fermandarên YBŞ’ê Tîrêj Şengalî têkildarî girîngî û wateya perwerdeyê axivî. Şengalî anî ziman ku di dîroka Ezdatiyê de, cara yekem e hêzeke parastina Ezîdxan di akademiyan de xwe perwerde dike û wiha dewam kir: “Bi rastî di rojek wisa girîng a dîrokî de ku heval xwe li ser esasê fikrê Rêber Apo, fikir û felsefeya Ezdatiyê perwerde dikin ji bo me pir girîng e. Di dîroka Êzîdiyan de heya niha cara yekem e hêzeke leşkerî wek YBŞ û YJŞ xwe rêxistin û perwerde dike.”

 

 

Mirova/ê ji fikir û felsefeya Rêber Apo bawer be dikare vî gelî biparêze

 

 

Şengalî, da zanîn ku berî fermanê eger hêzeke wek YBŞ û YJŞ hebûya, wê pêşiya fermanê bihata girtin û wiha dewam kir; “Îro armanca em xwe perwerde dikin ew e ku em di akademiyan re derbas bibin, di aliyê bîrdozî  û leşkerî de xwe kûr bikin da ku em karibin pêşiya fermanan bigirin. Miroveke/î ku bi fikir û felsefeya Rêber Apo, bi fikir û felsefeya Ezdatiyê bawer be dikare vî gelî biparêze.”

 

Tenê keç û jinên Êzîdxanê dikarin Êzîdxanê biparêzin

 

Şengalî, li ser parastina Êzîdxanê got: “Heval hemû jî dizanin gelek hêz beriya niha li vir hebûn. Digotin em Êzîdiyan diparêzin. Lê dema fermanê pişta xwe dan Êzîdiyan û reviyan. Divê heval di perwerdeyê de, xwe pêş bixin da ku karibin hemû nirxê mirovahiyê û Ezdatiyê biparêzin. Ji bo xwe ji milîtaniya demê re amade bikin, ji bo bibin şervanên pispor, parezvanên civaka xwe ev perwerde ji bo civaka Êzîdî gelekî bi wate û girîng e. Tenê keç û jinên Êzîdî dikarin Ezîdxanê biparêzin.”

 

Şengalî, di dawiya axaftinê xwe de  li ser damezrandina salvegera PKK’ê axivî û wiha axaftina xwe bi dawî kir;  “Wek tê zanîn sala 40. ya şoreşa azadiyê, şoreşa mirovahiyê ye. Di sala xwe ya 40. a îro de em dikarin bêjin bi saya şehîd Dilgeşan, Berxwedan û Şengalan em dikarin li vir bijîn. Çirûskek ji şoreşa mirovahiyê îro ev bû çar sal li Şengalê jî pêl bi pêl geş dibe û têkoşîna azadiyê bilind dibe. Li pey xeta Berxwedanan û Dilgêşan rêveçûn xwe di perwerdekirina li van akademiyan de derbas dibe. Xweperwerdekirin, ji bo me gelê Êzîdî,  ji nan û avê bêhtir pêwîst e. Bi taybet ji bo YBŞ û YJŞ’ê xweperwerdekirin, wê pêşeroja Ezîdxanê bixe bin temînatê. Li ser vî esasî ji bo destpêkirina vê perwerdeyê ji tevahî hevalan re serkeftin.”

 

 

 

 

(rn)