‘Rewşa welatiyan pir nebaş û xedar e’

26

 

 

MEXMÛR/ROJ NEWS

 

 

Welatiyên navçeya Mexmûr têkildarî girtina rê û rewşa li herêmê diyar kirin ku rewşa gelê herêmê pir nebaş e û gotin: “Bila rê bê vekirin”

 

Welatiyên Mexmûr ji ajansa me RojNews'ê re nêrînên xwe anîn ziman:

 

‘Bi hezaran kes ji bo pêwîstiyên jiyanî dabîn bikin vê rêyê bikar tînin’

 

,

 

Welatiyê bi navê Aram Cemal destnîşan kir ku heta niha nizanin bê ka çima rê li ser wan hatiye girtin û got: “Weke gelê navçeya Mexmûr heta niha em nizanin ji ber çi rê hatiye girtin. Ji sedî 70’ê welatiyên li navçeya Mexmûr dijîn Kurd in. Welatiyên Ereb ên roja ne tên Mexmûr tenê ji bo pêwîstiyên xwe yên rojane dabîn bikin, welatiyên derdorî navçe û gundên wê in. Ne tenê rêya me hatiye girtin, di heman demê de welatiyên wargeha Şehîd Rustem Cûdî jî hatiye girtin. Bi rojan bi hezaran kes ji navçeya Mexmûr û wargeha Şehîd Rustem Cûdî diçin bajarê Hewlêrê ji bo kar û pêwîstiyên din ên jiyan.

 

Heta niha ne hikûmeta navendî ya Bexda û ne jî hikûmeta Başurê Kurdistanê têkildarî girtina derî agahiyek zelal daye. Niha tenê gelê hejar û belengaz li nava Mexmûr in. Rojane ji bo pêwîstiyên xwe yên jiyanî û civakî pêk bînin vê rêyê bikartînin. Ev rê jî pir nexweş û metirsîdar e. “

 

‘Welatiyên herêmê ji bo pêdiviyên xwe destê xwe didin hev’

 

Cemal têkildarî xebatên zimetguzarî yên ji bo navçeyê jî wiha anî ziman: “Di aliyê zimetgozariyê de jî heta niha tiştek nehatiye kirin, bi taybet piştî navçeya Mexmûr hatî dagirkirin û şûnde. Welatiyên navçeyê di nava xwe de pere komkirine ji bo pêdiviyên welatiyên navçeyê. Eger heta roja Înê rê neyê vekirin, wê bi alîkariya welatiyên herêmê rêya ku têk çûyî bi mekîneyên kar û kepçeyan ji nû ve çêbikin. “

 

 

‘Bi derfetên xwe yên kêm û mekîneyên kar ev rê ji bo me çêkirin’

 

Aram Cemal bal kişand ser alîkariya gelê wargaha Şehîd Rûstem Cûdî û wiha pêde çû: “Bi taybet em spasî û minedariya xwe pêşkêşî welatiyên Wargeha Şehîd Rûstem Cûdî dikin. Di her demê dengavî û metirsîdar de deriyê xwe heta dawî ne weke mêvan weke xwediyê malê ji bo me vekirin. Ev rêya hûn niha dibînin ji aliyê wan ve bi derfetên xwe çêkirine. Her roj cihên têk diçin bi mekîneyên xwe yên kar tên çêdikin. Weke kes me bi xwe şahidiya wê kir gelek ciwanên me û welatiyên me li derve bûn hatin em dawetî malên xwe kirin.”

 

 

‘Welatiyên li naçveyê dijîn feqîr û jar in, yekane rêya pêdiviyên jiyanî hatiye qûtkirin’

 

 

Welatiyê bi navê Erselan selam jî bal kişand ser rewşa gel û got: “Halê hazir niha rewşa welatiyên navçeya Mexmûr gelek xirabe. Piranî welatiyên li navçeyê dijîn feqîr û jar in. Li ser vê re jî rêya ku yekane pêdiviyên rojane yên jiyanê dihatin dabînkirin hatiye girtin. Heta niha ne ji aliyê hikûmeta Kurdistan û ne jî ya hikûmeta navendî destê xwe dirêjî Mexmûr nekiriye. Welatiyên herêmê mane di navbera hêzên Pêşmerge û Heşdî Şebî de, ne pêşmerge dihêlin em biçin û ne jî Heşdî Şebî.”

 

‘Ji derveyî gelê wargeha Şehîd Rustem Cûdî kes bi hewara me ve nehat’

 

Selam got: “Em minetdarên gelê Wargeha Mexmûr in, ji derveyî wan ne tu hêz û ne jî tu kes bi hawara me ve nehatin. Di her metirsiyê de ji bo me bûn pal û pişt. Niha jî bi her awayî ji bo me xizmetê dike.

 

‘Bi van kiryaran dixwazin Mexmûr bê valakirin’

 

Erselan Selam bal kişand ser kiryarên li ser welatiyên herêmê tên meşandin û wiha anî ziman: “Niha jî elektirîka herêmê hatiye qutkirin, bi van kiriyaran dixwazin Mexmûr vala bikin. Welatiyên herêmê piranî Kurd in. Bila vê baş bizanibin em erdê xwe vala nakin û ji tu dijminan re bernadin. Tu kes jî ji Mexmûrê dernakeve.

 

‘Rê pir xirab e’

 

 

Her wiha Kawa Îsmaîl behsa astengiyên jiyanî û rê kir û got: “Bi rastî jî em di nava şert û mercên zehmet de ne. Hûn bi xwe jî dibînin rewşa rê çi ye. Rojane bi hezaran kes çi nexweş çi ji ber pêdiviyên rojane yên jiyanî diçin bajarê Hewlêr û yên din ên Başûrê Kurdistanê. Rê pir xirab e. Em nizanin çima rê hatiye girtin. Bang li hikûmeta Herêmê dikin ku vê rêyê vekin. Ev rê ne tenê ji bo me ji bo welatiyên wargeha Şehîd Rustem Cûdî jî gelekî girîng e. Hemû karê xwe li ser vê rêyê dikin. Rojane diçin û tên.”

 

 

 

(rn/wt)