NAVENDA NÛÇEYAN

 

 

Koordînasyona Partiya Jinên Azad ya Kurdistanê (PAJK) têkildarî salvegera komploya navnetewî ya li dijî Rêberê PKK’ê ya Abdullah Ocalan daxuyaniyek nivîskî weşand û berxwedana Îmraliyê ya Rêberê PKK’ê Abdullah Ocalan silav kir. PAJK’ê her wiha  di şexsê şehîdên çalakiya bi dirûşma, 'Hûn nikarin roja me tarî bikin' de hemû şehîdên şoreşê bi bîranî û ji bo afirandina jiyan û welatê azad soza serketinê da.

 

Koordînasyona PAJK'ê, komploya li dijî Ocalan weke darbeyeke binketî bi nav kir û got, "Komploya 15'ê Sibatê ji bo pêşîgirtina li mezinbûna têkoşîna azadiyê ya li Kurdistan û gelemperiya Rojhilata Navîn hate kirin."

 

PAJK'ê diyar kir ku gava destpêkê ya li Kurdistanê hate avêtin, pêngava azadiyê bû û komplo jî li dijî vê pêngavê hate kirin. Di daxuyaniyê de hat gotin, "Rêberê me ji roja destpêkê ve bi ked û hewldaneke mezin, bi pêngavên azadiyê têkoşîn xurt kir. Êrîş û komployên gengaz ên li dijî têkoşînê ji berê ve dît û li gorî vê yekê rêxistinbûn û hişmendiyeke têkoşînê afirand."

 

Di dewama daxuyaniyê de hate ragihandin, hêzên komploger ê li pêşberî berxwedana Rêberê me têk çûn, ji bo armanca xwe bi ser bixînin van salên dawî bi kiryarên herî qirêj û şerê hovane komployê li ser tevahiya Kurdistanê digerînin.

 

Koordînasyona PAJK'ê diyar kir ku ji ber vê yekê bi rengekî bê perwa êrîşî her devera welêt dikin û got, "Tevahiya gelê me bi taybetî jî jin, hêzê ji berxwedana dîrokî û bi rûmet a Rêberê me ku xeleka komployê parçe kiriye werdigirin û ji bo parastina hebûna xwe û pêkanîna azadiya xwe dest bi Şerê Gel ê Şoreşgerî kirin."

 

Di daxuyaniyê de bal hate kişandin ser şer û berxwedana gelê Bakurê Kurdistanê ya bi pêşengiya gerîla, serketina Kobanê û şoreşa gel û jinan a li Rojavayê Kurdistanê û hate gotin, "Jin û gelê me yê li Efrînê ku di xeta Zîlan de ji bo parastina ax û welatê xwe yê azad şer dikin û li ber xwe didin, bi biryar in ku komployê pûç bikin. Her derba li dijî pêngava azadiyê tê têkbirin, pêngavên me yên azadiyê jî mezin û berbelav dibin. Dayikên me yên Efrînî bi vê bîr û baweriyê, bi baweriya ji serketinê û serbilindiya berxwedana xwe li dijî hêzên komploger têdikoşin. Şerê gel ê şoreşgerî yê li Efrînê, têkoşîna li gelemperiya Rojhilata Navîn belav bûye mezintir dike. Îdeolojiya me ya azadiyê, felsefeya me û rêxistinbûna me bûye perspektîf û hêviya azadiyê ji tevahiya mirovahiyê re."

 

Koordînasyona PAJK'ê destnîşan kir ku siyaseta komployê hatiye têkbirin û got, "Di salvegera 20'an a têkoşîna dijî komployê de em careke din dibêjin; siyaseta komploya navneteweyî ya 15'ê Sibatê hatiye têkbirin."

 

Di dawiya daxuyaniyê de şerê gel ê şoreşgerî baweriya serketinê afirandiye, ev ruhê serketinê li her devera Kurdistanê, Rojhilata Navîn û tevahiya cîhanê wê belav bibe û serketinê mayinde bike.

 

PAJK'ê got, "Li Kurdistan û Rojhilata Navîn dem dema serketinê ye. Azadî û serketina me wê bi azadiya Rêberê me mayinde bibe."

 

ОСТАВЬТЕ ОТВЕТ

Please enter your comment!
Please enter your name here